हाम्रा यी झरना पहाड हरिया,देखेर आँखा भरि
नेपाली धरती हिमाल बहुतै ,हेर्दै छु मख्खै परि ।
चम्केको छ सुनै बनेर कहिले, चॅादी र मोती यहाँ
मेरो देश सधै बनोस प्रियनै,बोकेछु आशा यहाँ ॥
यो माटो शिरमा दलेर जसले,खुट्टा बढायो अघि
त्यो अग्लो चुचुरा चढेर उसले,नामै कमायो पछि ॥
नेपाली पहिलो भएछ जब यो,सुन्दा खुशीले यहाँ
मेरो देश सधै बनोस प्रियनै,बोकेछु आशा यहाँ ॥
पीडा ती मनका हरेर सबका,चङ्गा बनाई दियो
यस्तो शक्ति छ देशमा नभुले,भुल्ने बनाई दियो
हाम्रा हात सधै चलून नमरे, खन्ने छ माटो यहाँ
मेरो देश सधै बनोस प्रियनै,बोकेछु आशा यहाँ ॥
बाँचेकै छ यहाँ मिलेर अहिले ,धोती र टोपी सबै
बेला भो अब लौ मिलेर घरमा,बस्ने त हामी सबै
गालामा सबका बिहानपख नै ,देखिन्छ लाली यहाँ ॥
मेरो देश सधै बनोस प्रियनै,बोकेछु आशा यहाँ ॥
डाँडा लाल भए हिमाल छेउका,लालीगुराँसै फुली
डाँफे झै रमने मजूर वनमा, नाच्दै छ देशै डुली ॥
यो देशै हिउका विशाल जलले, बाँचेछ सारा यहाँ।
मेरो देश सधै बनोस प्रिय नै,बोकेछु आशा यहाँ ॥
यो माटो मलिलो बनेर जलमा, बग्दै छ ढुङ्गाे गली
भो धेरै मलिलो मधेश धरती , ढाकेछ अन्नै फली ।
साच्चै नै भरियो तमाम मुखमा, प्राणै बनैरै यहाँ ।
मेरो देश सधै बनोस प्रियनै,बोकेछु आशा यहाँ ॥
ती मीठा रसिला हिमाल भरिका राता गुलाबी फल
त्यो जस्तै छ यही मिठास अति नै,हाम्रै नदीका जल ।
यो नै हो अमरावती जगतको,हाम्रो र तिम्रो यहाँ
मेरो देश सधै बनोस प्रियनै ,बोकेछु आश यहाँ ॥