आफ्नो छातीमा हात राख
जनताले तिम्रो छातीमा मुटु राखिदिएका छन्
कमसेकम त्यो मुटुसँग खेलाँची नगर ।
किनकि त्यो मुटुमा तिम्रो जस्तै
धेरै सपनाहरूको प्राण जोडिएको छ ।
बन्दाबन्दै बन्न नसकेका
पुलहरूको प्राण जोडिएको छ
फुल्दाफुल्दै फुल्न नसकेका
फूलहरूको प्राण जोडिएको छ
‘जिन्दगी बाँच्नुभन्दा मर्नु बेस’ भन्ने
थुप्रै भुलहरूको प्राण जोडिएको छ ।
नभुल तिम्रो पोल्टामा भरिएको खुसी
खाली पोल्टाहरूको पनि खुसी हो
चिमको छेका र चुहिने छानोको पनि हो
चुलोमा नजुटेको मानोको पनि हो ।
मानौँ, तिमी नै नयाँ नेपाल हौ !
तिमीलाई मैले निराशापछिको आशा
र हराएको विश्वासपछिको
भरोसा भनेँ भने के हुन्छ ?