हे प्रभु ! मेरो
प्रार्थना बुझिदेऊ
मलाई मेरो आफ्नै इच्छा मेटिदेऊ
सानैदेखिको सपना
झ्वाँक यो तरुनीको कल्पना
मलाई एक लाहुरे मिलाइदेऊ
तल्लो घरको झुमाको जस्तै
कर्मठ र योग्य वर मिलाइदेऊ !
मलाई स्वच्छन्दता चाहिन्छ
मलाई लाहुरेनी हुने रहर होइन
सुन र हीराको रहर होइन
देश र विदेशको रमझम होइन
तर मेरो जवानी बुझिदिने
नारी–अस्मिताको रक्षा गरिदिने
नारी–स्वतन्त्रताको कार्यान्वयन गरिदिने
नारीभित्रको जैविकता थामिदिने
फ्रायडको यौन–मनोविज्ञान
बुझिदिने
सुम्निमाको भिल्ल पुरुष जस्तै
मलाई एक योग्य लाहुरे चाहिन्छ !
लाहुरे, लाहुरे मात्र
होइन
लाहुरे एक तालिम प्राप्त सिपाही मात्र होइन
बन्दुक र गोलाबारुदको अर्थ मात्र होइन
दुश्मनको लागि भक्षक
अनि नीति–नियमको पालक मात्र होइन लाहुरे
लाहुरेभित्र छुट्टै पुरुषार्थ छ
नारीवाद र यौनवादको भरपूर ज्ञान छ
छाउनीमा खेलेको परेडको भरपूर सीप र ताल छ
त्यसकारण मलाई लाहुरे चाहिन्छ !
मलाई लाहुरे मात्र होइन
उसले लगाएको कम्ब्याट देख्दा मात्र
उसले खेलेको परेड हेर्दा मात्र
मलाई छुट्टै आनन्दको अनुभूति हुन्छ
जीवनको बेग्लै पहिचान हुन्छ
त्यसकारण मलाई लाहुरे चाहिन्छ !
कति स्वच्छन्दतामा बग्दछ लाहुरे
कति यथार्थमा डुब्दछ लाहुरे
एक नारीको मनोभावभित्र
एक नारीको चाहनाभित्र
वर्षाको झरीझैँ बर्सन्छ लाहुरे
हावाको वेगझैँ दौड्दछ लाहुरे
आहा ! कति ठूलो सङ्कल्प
कति महान् सपना
धन्य छे तल्लो घरकी झुमा
हजारौँ लाहुरेका प्रिय झुमाहरू !!!
त्यसकारण मलाई लाहुरे चाहिन्छ ।