कविता : म के गरूँ ?

शब्द लेखूँ कि सङ्गीत भरूँ
चित्र कोरूँ कि मूर्ति कुँदूँ
इतिहासका पानामा
छुटेका ती कथाहरू भन्न
कलाको कुन आयाम प्रयोग गरूँ म ?

समयलाई धिक्कारूँ कि ईश्वरलाई पुकारूँ
सडकमा चिच्याऊँ कि पत्थरझैँ मौन बसूँ
फाटेका यी मनहरू जोड्न
अभिव्यक्तिको कुन माध्यम प्रयोग गरूँ म ?

खाएर निलूँ कि घोटेर लगाऊँ
डाक्टरलाई देखाऊँ कि वैद्यलाई भेटूँ
समयको यो विकार निदान गर्न
उपचारको कुन विधि गरूँ म ?

श्रव्यदृश्य बनाऊँ कि अभिनय गरूँ
बहुजनको अनुयायी बनूँ कि सत्यको उदाहरण बनूँ
मानिसलाई मानिस हौ भनेर बुझाउन
सञ्चारको कुन प्रविधि प्रयोग गरूँ म ?