झ्योमोलाङमा पग्लिन थालेपछि
खुम्बु आइसफलभित्रबाट
खुम्बु खोला जन्मन्छ ।
खुम्बु आइसफल र खोलाको कथा हेर्न
कोही हेलिकप्टरको गर्जन चढेर
पुग्छ त्यहाँ ।
हेलिकप्टरको धुवाँले पोतिन्छ
झ्योमोलाङमाको चेहरा ।
दुःखी हुनुको सट्टा
हेलिकप्टरभित्र आवाज गुन्जिन्छ
"मज्जा आयो
कस्तो देखियो झ्योमोलाङमा !"
अनि त्यही गर्जनसँगै
सहर फर्किन्छ ऊ
सुनाउन थाल्छ
विश्वव्यापीकरणको कथा ।
सबैले झ्योमोलाङमाको शिखर देखे
तर
कसैले पीडा देखेन ।
शब्द–अर्थ (शेर्पा भाषा )
झ्योमोलाङमा : सगरमाथा