भू-गोलको गोल चक्करमा
अविरल, अविच्छिन्न
अविचलित, अथक
अनवरत यात्रा
बेगन्तव्य ।
उपस्थिति विना
जीव-जगत् अधुरो, अपुरो
र मिथ्या।
जन्मँदा ‘च्याँ’
र मर्दा ‘आँ’ सम्म।
अदृश्य
न रङ्ग, न रूप, न आकार
न स्वाद, न ओजन, न भोजन
न जन्म, न मृत्यु
अजर-अमर
मात्र स्पर्शको अनुभूति ।
कहिले मन्द समीर
कहिले प्रलयकारी आँधी
अदम्य
बस्ती-जङ्गल फाँड्दै
बाली-गुड-कटेरा माड्दै
सागरको लहरदेखि
सगरको तालुसम्म ।
कहिले पछ्यौरी तान्दै
अङ्ग-अङ्ग मुसार्दै
कसैलाई पछार्दै
सल्लीपिरसँगै सुसेल्दै
धानसँग बयेली खेल्दै
पोखरी-तलाउ-समुद्रमा
तरङ्ग चाल्दै ।
भिर-पाखा
गुराँस-लालीसँग मस्कँदै
चराको चिरबिर
बाँसुरीको सुरसँगै
मभित्र, मबाहिर
कमिलादेखि ह्वेलसम्म ।
भवसागर अद्भुत !
न खरिद, न बिक्री, न भण्डारण
बिनामूल्यमै प्राप्त
अमूल्य ।
गति
न सिमानाले रोक्यो
न पर्वत-शृङ्खलाले छेक्यो
न घामले पगाल्छ
न हिउँले जमाउँछ
न आगोले जलायो
न बाढीले बगायो
न ओरालीमा लड्यो
न उकालीमा पसिना काढ्यो ।
न गोरेटो, न साँघु
न रात, न दिन
न औँसी, न पूर्णिमा
अगाडि कता? कता छ पछाडि ?
वैश्विक युग
उपभोगको नाममा मानवद्वारा अतिक्रमित
दोहित र प्रदूषित ।
आगमन कहाँबाट ?
र प्रस्थान विन्दु ?