हामी गुडिरहेको सडक
हतारोको सङ्ग्रह हो ।
कालो सिसाभित्रको शासकलाई
सत्ता भोग्न हतार छ
लेन मिच्दै कुदेका महाशयलाई
मदिरा पिउन हतार छ
दुईपाङ्ग्रेमा बत्तिएका कारिन्दालाई
हाजिरी जनाउन हतार छ ।
हतार धेरैलाई छ
जेब्राक्रसमा नानी डोहोर्याइरहेकी आमालाई
स्कुल पुग्न हतार छ
सडकपेटीका भोका भरियालाई
भारी पाउन हतार छ
धोका खाएकी प्रेमिकालाई
रुने एकान्त पुग्न हतार छ ।
सडकमा भ्रष्टहरूलाई पनि हतार छ
सदाचारीलाई पनि हतारै छ ।
पुलिसलाई बन्दी ओसार्न हतार छ
तस्करलाई माल ओसार्न हतार छ ।
फूल बेच्ने माली र मासु बेच्ने कसाही
दुवैलाई निकै हतार छ ।
एम्बुलेन्स चिच्याउँदै कुदिरहेछ
बिरामीलाई हतार छ ।
मुढा लादिएको ट्याक्टर बत्तिँदै छ
चितालाई हतार छ ।
शववाहन रुँदै कुदिरहेछ
मलामीलाई हतार छ ।
यहाँ हतार नहुनेहरू पनि छन्
गोजी टक्टकिएका श्रमिक
कोठाभाडा नतिरेका विद्यार्थी
ओखती नकिनेका कुरुवा,
जिन्दगानीको भागदौड बुझेका वृद्ध
आजलाई शरीर बेचिसकेकी नगरबधु
सडकको लय पढिरहेको कवि
र स्वयम् सडक !
हतारोका यी बागीहरूलाई लाग्छ
सबै हतारोहरू
सबैका होइनन् ।