कविता : घाट र ब्लुज

म ‘Psychopath’ नहुँदो हुँ त

मैले पनि भन्थेँ होला

घाटमा के खोज्दै भौतारिएको होला !

कि त्यो मान्छे ‘Psychopath’ हो !

हो

म ‘Psychopath’ हुँ

मैले घाटमा सबथोक भेट्छु

फूलको सुवास सुँघ्छु

नदीको वेग थाम्छु

ढुङ्गाहरूको विशाल सभा देख्छु

आगोको क्रान्तिकारी विचार सुन्छु ।

हो

म ‘Psychopath’ हुँ

मैले घाटमा लासहरूको मीठो साङ्गीतिक राग सुन्छु

विभिन्न थरीका नाचहरू देख्छु

सँगसँगै म पनि नाच्छु ।

कामवासनामा लिप्त भएको देख्छु

निर्धक्क सम्भोग गरिरहेको देख्छु ।

हो

म ‘Psychopath’ हुँ

मैले घाटमा बुद्ध र बुद्धको सन्देश भेट्छु

दार्शनिकका दर्शनहरू भेट्छु

समाजशास्त्र, अर्थशास्त्र र शास्त्र नै शास्त्र पढ्छु

र जीवनको अन्तिम मोक्ष भेट्छु ।

हो

म ‘Psychopath’ हुँ

घाट मन पर्ने

घाटमै संसार देख्ने

घाटमै खुसी हुने

एक कुमार नगरकोटी

अर्को म हुँ !