एक फूल जस्तै ऊ पनि
एक वसन्त त हो ऊ पनि
हरेक ऋतुका लागि बाँच्ने
रम्ने, रमाउने अनि आफूलाई सजाउने ।
एक पिँढी बढाउन उसले पनि त
चुँड्नेहरूलाई के मतलब?
त्यो कसले, कहाँ, कसरी हुर्काए, बढाए अनि सजाए ।
चुँड्नेले त चट्ट चुँड्यो अनि
प्रेममा उपहार भनिदियो
त्यही प्रेमको उत्साहमा
उसलाई फूल जस्तै चुँडेर
बोटलाई झैँ नाङ्गो बनाइदियो ।
मल–जल बिना नै उजाड बनाउने
अनुमति कसले दियो ?
मैले आँसुको जल दिएर रसिलो बनाएको हुँ
रङ्गीन हुनलाई आफ्नो रगत सिँचेको हुँ
माली भएर सोचेको भए त
उसको हरेक रात सिरानी किन भिज्थ्यो होला ?
हेर्नुहोस् ऊ पर
त्यही हो जहाँ फूल जस्तै ओइलाएको
एक जीवन ढलेको छ !