नानीबाबुहरू !
तिमीहरूले बुझ्नुपर्छ
समय फेरिएको छ
हिजोसम्म
यत्रतत्र छरिएका
काला ढुङ्गाहरू
आज
एकाएक
देवता बनेर
मन्दिर छिरेका छन्
मान्छेहरू
आज उनै ढुङ्गाहरूलाई
देवता मानेर
फूल-अक्षता चढाउन
ढोका बाहिर लाइनमा छन्
जसरी
हिजो
पुराना ढुङ्गाहरूका अगाडि
लामबद्ध हुन्थे
मान्छेहरू ।
नानीबाबुहरू !
मन्दिरको भित्रपट्टि
ढुङ्गाहरू फेरिएका छन्
फेरिएका ढुङ्गाहरूसँगै
ढोका बाहिर
भक्तहरू फेरिएका छन्
भक्तहरूका तरिका फेरिएका छन्
तर
फेरिएका छैनन्,
थोरै भेटी चढाएर
अकुत वरदान कुम्ल्याउने
भक्तहरूका चाहना ।
जहिलेदेखि
यी खोटा ढुङ्गाहरूलाई
मान्छेहरूले भगवान् बनाए
हो
त्यसै बेलादेखि
झन् गाढा भएको छ रात
र
जन्मिन सकेको छैन
हाम्रो मायालु बिहान ।