बा
ढुक्क हुनुहोस्
तपाईँको छोरा महँगो स्वाभिमान
सस्तो श्रमबजारमा
कौडीको भाउमा पौरख बेचेर भए पनि
पठाएको छु
धेरैथोर रेमिट्यान्स
ढुक्कसँग खानुहोस् किनेर
पञ्जाबको चामल र बिहारको आलु–प्याज ।
बिर्सिदिनु पिरालो
आफ्नो खेतबारी बाँझो भएको कुरा ।
आमा
परदेशी छोराछोरी सम्झेर नरुनुहोस् ।
दाइ काठको बाकस बनेर फर्के पनि
भाइ जिउँदै छ ।
पुर्याउँछु तिम्रो रहर
बुट्टेदार बनारसी साडी किनी पठाएर अरबबाट
सुर्ता नलिनु सम्झेर
हेटौँडाको कपडा कारखाना
बन्द भएको कुरा सम्झेर ।
ढुक्क हुनुहोस् तन्नेरी सरकार !
तिम्रो अभिमानको निम्ति
हामी आफ्नो स्वाभिमान
बिरानो मुलुकको भुँडेवाल
साहु–साहुनीको चरणमा राखेर बन्धकी
सकेजतिको
आर्थिक सहयोग गरौँला !
ढुक्क हुनुहोस्
कुन्नि के के बासी हो ।
वर्षौँदेखि
हराभरा मनोहरा र बागमतीको सुगन्धले
मोहित हुनुभएका दाजुभाइ
होल्डिङ सेन्टर हुँदै
आफ्नै नाउँको लालपुर्जा
प्राप्त हुने सदिच्छा पूरा हुँदैछ ।
ढुक्क हुनुहोस् !
हुनेखाने घरका होइनन्
हुँदाखाने घरमा पैदा भएका
सुदूरका
कुपोषणग्रस्त नानी–बाबु हो
डीडीसीद्वारा उत्पादित
सञ्जालमा तैरिएको चिजको झकास फोटोले
हृष्टपुष्ट निरोगी बनाउँछ ।
ढुक्क हुनुहोस्
युवा अनि युवती हो
पासपोर्टको निम्ति मुकाम वा राजधानीमा पुगेर
भोकभोकै लाइनमा घण्टौँ बस्नु पर्दैन
अब तन्नेरी सरकारले
घर–घरमा सम्म
कुरियर गरेर पठाउँछ ।