भगवानसँग हात मिलाएपछि
मैले छोरीको गोडा ढोगेँ ।
तिम्रो चरणमा के राखेकी छौ ?
संसार? भगवान्? कि दास ?
आफूबाट आफैँलाई उत्सर्ग गरेको म
कसको चरणमा शिर राखौँ ?
अनेक धुलोमैलो कुल्चेका तिम्रा पाउमा ?
कि अनेक थिचोमिचो सम्याएका भगवान्का पाउमा ?
स्नेहको लात्तीले बारबार आमाको पेटमा
भ्रूणबाटै “म तिमीमै छु” भनी सङ्केत दिने पाउहरूमा
मैले मेरो शिर अर्पेको छु ।
भगवान्का पाउहरूमा
मेरो भक्ति होला
मेरो सम्मान होला
मेरो समर्पण होला ।
तर, मेरो छोरीको पाउमा
मेरो शिर हुनेछ।
भगवानसँग हात मिलाएपछि
मैले छोरीको गोडा ढोगेँ ।