(लघुकविता)
युगको एउटा कठघराभित्र
बाँचेर पनि मरेका मान्छेहरू देखियो
र त्यही युगको त्यही कठघराबाहिर
मरेर पनि बाँचेका मान्छेहरू देखियो ।
खै के-के देखियो देखियो
कुनै एउटा भयभीत सपनाझैँ
चिताको अङ्गारमा कालो पैसाको
लास बल्दै निभ्दै… बल्दै निभ्दै छिनमा आगो
छिनमा धुँवा भएर सात दिनसम्म
डढेको पनि देखियो ।
कसलाई लाग्थ्यो होला र
त्यति अग्लो सिँढी भएर अग्लिँदा पनि
त्यति गहिरो छिँडी भएर गहिरिँदा पनि
धनको अवसान यसरी हुन्छ भनेर !
तर अफसोस
आज त्यही डढेको धनले पनि
समयलाई हाँक दिइरहेको छ ।