के गर्व गर्नु छ र जन्म दिएर छोरा
छोरा भए कपुत यौन पिपासु मोरा ।
रक्षार्थ खट्न नसके जित हुन्न हार
छोरी सुरक्षित रहुन् छ यही पुकार ।।१।
छन् गिद्धका हुल यहाँ अनिँदो बसेका
चल्लाहरू खबर छन् तिनले डसेका ।
यो हाल सुन्नु नपरोस् अब बारबार
छोरी सुरक्षित रहुन् म गरूँ पुकार ।।२।
हाम्रो समाजछ कतातिर भासिँदै झन्
संस्कार मूल्य सब देख्दछु मासिँदै छन् ।
खोजौँ निदान जड शीघ्र बनोस् किनार
छोरी सुरक्षित रहुन् मनको पुकार ।।३।
आमा अचेत घरमा अलपत्र छोरी
आनन्दको सयर गर्छ उता अघोरी ।
निभ्नेछ झ्याप बिजुली चुँडिनेछ तार
छोरी सुरक्षित रहुन् सबको पुकार ।।४।
यस्तो कडा नियम होस् जति छन् पिपासु
हुन् झार्न बाध्य गहबाट बलिन्द्र आँसु ।
जम्मा भए पनि बुझौँ किन पाँच चार
छोरी सुरक्षित रहुन् जनको पुकार ।।५।
हुन निर्मला र इनिशा कि त अंशु नामी
उर्लेर ज्यान किन लिन्छ सधैँ सुनामी ।
उमुक्त बाज नउडोस् नगरोस् सिकार
छोरी सुरक्षित रहुन् दिलको पुकार ।।६।
सानन्दले घर फिरून् अब ढुक्कसाथ
छोरी निरीह नबनुन् कहिल्यै अनाथ ।
गोडेर फ्याँक्नुछ जरै सब यौन झार
छोरी सुरक्षित रहुन् सुनियोस् पुकार ।।७।