हरेक शब्द शब्दमा छ छन्द ताल मोहनी
अभाव भाव भिन्नमै छ छन्द जाल मोहनी
छ वेद वर्ण वर्णमा सुवास छन्द माधुरी
म भेट्छु पर्ण पर्णमा पराग छन्द माधुरी ।। १ ।।
छ कोइली कुहूकुहू वनै रनक्क गीतमा
बडो मजा छ छन्दको मुनाल नाच प्रीतमा
वसन्त वाग रागमा सुगन्ध छन्द पुष्कर
अहो जताततै छ छन्दकै प्रदीप्त भास्कर ।। २ ।।
भए नि भित्र भिन्नता प्रगाढ लाग्छ मित्रता
बुझे त यै समाजमा अचम्मको छ एकता
उठेर हेर ती चरा उडे सँगै बथानमा
छ छैन हेर छन्दकै विधान त्यो उडानमा ।। ३ ।।
छ ओठ लाल छन्दमा छ केशपाश छन्दमा
छ पाउ बाहु छन्दमा र सास चल्छ छन्दमा
प्रिया दिनै लगाउँछिन् सछन्द चक्षु अञ्जन
जहाँ म हेर्छु त्यै कुरा म देख्छु छन्द रञ्जन ।। ४ ।।
बिहान हुन्छ छन्दमा चिहान हुन्छ छन्दमा
म प्रेम बुन्छु छन्दमा घृणा म रुन्छु छन्दमा
बतास खास चल्छ झन् बहेर एक छन्दमा
छ घाम जून छन्दमा प्रकाश हुन्छ छन्दमा ।। ५ ।।
छ भित्रको जरा जरा अझै छ पात पातमा
म देख्छु छन्द छन्दकै छ स्वप्न रात रातमा
म लेख्छु छन्द छन्दमै सुकाव्य बात बातमा
म उठ्छु छन्दमै सदा नवीन भै प्रभातमा ।। ६ ।।
सुवास खास फूलमा छ छन्द राज सौरभ
हिमाल हाँस्छ छन्दमै सजेर ताज गौरव
ससीम बस्छ छन्दमै पुगेर हेर सागर
हरेक वस्तु छन्दमै बिना सुछन्द के छ र ? ।। ७ ।।
रहेर छन्द सूत्रमै बदल्छ चक्र सृष्टिले
भएर छन्द युक्त नै म देख्न सक्छु दृष्टिले
उडेर वायु छन्दमै झरी नि झर्छ छन्दमै
कठै छु कोपिला फुली म झर्नु पर्छ छन्दमै।।८।।
छरेर छन्दको छटा अपूर्व पूर्व मूलका
धरेर बासना मिठो फुले सुकाव्य फूलका
कुँदेर छन्दकै कला सिँगारले भरी भरी
उनेर पुष्प छन्दकै बगान छन् थरी थरी ।।९।।
म सुत्छु छन्दमा मिली ब्युँझन्छु छन्दमा रमी
म हिँड्छु छन्दमै सदा म बोल्छु छन्दमै गमी
म सुन्छु छन्दमै सबै तरङ्ग रङ्ग साथले
म लेख्छु भाग्य छन्दमै यिनै पवित्र हातले।।१०।।