(लघुकविता)
१. भ्रमको काख र आमा
जीवनका गोरेटोहरूमा
मैले आमा, सानीआमा, सौतेनीआमा
र अरू धेरै आमाहरूको
मातृत्व, करुणा र क्रोध भोगेको छु
मेरो त्यो भोगाइले
समय घर्किसकेपछि मात्र थाहा पायो कि
सबै आमालाई “आमा” मान्नु
धोका र भ्रम पनि हुन सक्ने रहेछ
किनकि पुतनाले
आमा बनेरै कृष्णलाई
विषालु काखमा राखेकी थिइन्
२. परम्परा
परम्पराको नाममा
राउटेलाई अझै जङ्गलमै छाडिएको छ
सहर त्यसैमा खुसी छ
गाइनेलाई अझै
सारङ्गीको धुन बोकेर
गाउँ चाहार्न विवश पारिएको छ
संस्कृति त्यसैमा खुसी छ
र परम्पराकै नाममा
अझै हजार चोट दिएर
भक्कुको राँगो मारिएको छ
मानवता त्यसैमा खुसी छ
तर के यो परम्पराको खुसी
सबैका लागि
सधैँका निम्ति हुन सक्छ ?
परम्परा त आखिर
“सतीप्रथा” पनि परम्परा नै थियो