बालेन
मुरीमुरी माया र शुभकामना, प्रिय !
अहिले तिमी देश र जनताको शपथ लिएर ओर्लेका छौ
सिंहदरबारकाे भित्तामा झुन्ड्याउनु
केही थान हलो जोतिरहेका गरिब किसानका तस्बिर ।
अनि हेर्नु पुलुक्क
हरेक निर्णयको मोडमा सम्झनु
ती आँखा, जसले परिवर्तनको सपना देखेका छन् ।
हेर्नु तिनै तस्बिर अनि कोर्नु नक्सा
देश विकासको, प्रिय !
बालेन
तिमी यहाँसम्म आइपुग्नु कुनै सामान्य कुरा होइन
यो त महाविजयको पहिलो पाइला हो ।
जसरी पाण्डवले महाभारतमा कौरवलाई परास्त गरी
विजय प्राप्त गरेका थिए सत्यको
त्यस्तै यो त युगान्तकारी परिवर्तन हो, प्रिय !
त्यो प्राप्त गरी तिमी उभिएका छौ अहिले ।
बालेन
तिमीले बुझेकै होलाौँ भरोसाको अर्थ
तिमीलाई राम्ररी थाहा छ
यो पाला तिमीलाई जनताले भरोसा गरेका छन् ।
त्यसैले उनीहरूको आशामा तुषारापात हुन नदिनु, प्रिय !
भरोसा टुट्न नदिनु
आशा र भरोसा टुट्यो भने सपना मात्र होइन
मन टुट्छ ।
मन टुट्यो भने फेरि कुनै अर्को आशा रहँदैन, प्रिय !
बालेन
तिमीले जनताका सबै सपना पूरा गर्ने सङ्कल्प गर्दागर्दै
प्रयास गर्दागर्दै पनि
कुनै बेला बाटो अलमलियौ भने, प्रिय !
जनताका आवाजहरू धमिलो सुनिन थाले भने
अनि टक्क रोकिनु, प्रिय !
फेरि एकचोटि फर्केर हेर्नु
त्यहीँ भित्तामा झुन्डिएका तिनै गरिब किसानका तस्बिर ।
त्यहीँ भेट्नेछौ तिमीले मार्गनिर्देशन
त्यहीँ पाउनेछौ अगाडि बढ्ने शक्ति ।