अब असारको झरीलाई स्वीकारेर
खेतका गह्रा–गह्रामा हरियाली झुलाउनु छ
बर्खे यामको गर्मीलाई पसिनाको
थोपा–थोपामा किसानले परिभाषित गर्नु छ ।
गर्मीको याम हो
शरीर तात्छ, मथिङ्गल गर्माउँछ
तर भित्री आत्मा भने बाँझो खेतको
हरियालीले शीतल गराउँछ ।
हो, यो असारे महिना हो
किसानहरूमा जागरूकता छाउँछ
ओइलाएका अधरहरूले मुस्कानको मिठास पाउँछन् ।
एक थाल चाम्रे र एक कचौरा मोहीमा
अब हली र रोपारहरूको पेट र मन तृप्त हुन्छ ।
वर्षौँदेखि धाँजा फाटेका खेतहरूमा
अब वसन्त बयेली खेल्छ
खेतका आली–आलीमा
किसानका पौरखहरू
अन्नको झुप्पो भएर सुस्तरी बहने
शीतल पवनसँग बुर्कुसी मार्छन्।
यो वर्षातको याम हो
परिश्रमले किसानको मनमा खुसी सिञ्चिन्छ।