चिता एउटै हुन्छ
मलामीको सङ्ख्या फरक हुन सक्छ ।
चितामा अर्पिएका मालाको रङ फरक हुन सक्छ
तर मुखाग्नि दिने आगोको लप्का एउटै हुन्छ ।
धन, सम्पत्ति, गरिबी, दरिद्रता
मूल्य, मान्यता सबै एकैचोटि शून्यता ।
मनको हिसाब सबै शून्य
धनको हिसाब सबै शून्य ।
जवानीको तापलाई कति सजिलै निल्छ आगोको तापले
उन्मादको रापलाई कति सजिलै निल्छ आगोको रापले ।
यस्तो लाग्छ कि अन्तिम सत्यको साक्षी हो यो ठाउँ
आर्यघाट, यात्राको विश्राम स्थल ।
त्यो छेडोबाट हावा बग्छ
बाग्मती बगिरहन्छिन्
खरानी उड्छ—
अन्त्यमा सबै बग्छ
एउटै भएर बग्छ
त्यहाँ कुनै भेदभाव हुँदैन ।