मभित्र मेरै अस्तित्वको एउटा महा-विवाद चल्दै छ
चेतनाको विशाल नदीमा सोचको आँधी बग्दै छ ।
डुब्ने पनि मै हुँ यहाँ, किनारा खोज्ने पनि मै
आफ्नै विरुद्ध आफ्नै, एउटा मौन युद्ध चल्दै छ ।
कहिले म न्यायाधीश बन्छु, कहिले आफैँलाई दोषी देख्छु
कहिले मन पत्थर बन्छ, कहिले आफैँभित्र कोसी देख्छु ।
हिसाब गर्दा आफैँसँग, सधैँ रित्तो हात हुन्छु
आफैँले बुनेका भ्रमका जालीमा, अचेल म मात हुन्छु ।
कसरी लुकाउनूँ ती कुरा, जो ऐनाझैँ छर्लङ्ग छन्
मेरा सबै आशाहरू, आफ्नै गल्तीमा नग्न छन् ।
मभित्रको मलाई नै यहाँ, पीडाको रापले सेक्नुपर्दछ
मेरै गल्तीको सजाय पनि, मेरै भागमा लेख्नुपर्दछ ।
हो, आज फेरि मभित्र मैसँग भीषण विवाद चल्दै छ ।