नेपाल प्रज्ञा–प्रतिष्ठानको पारिजात प्रवचन कक्षमा झिल्का साहित्य समाज नेपालको आयोजनामा पुस्तक विमोचन तथा झिल्का वाचन कार्यक्रम सम्पन्न भएको छ ।
कार्यक्रममा नेपाल प्रज्ञा–प्रतिष्ठानका निवर्तमान सदस्य–सचिव डा. धनप्रसाद सुवेदी प्रमुख अतिथि रहनुभएको थियो भने झिल्का साहित्य समाज नेपालका अध्यक्ष तथा झिल्का प्रवर्तक वसन्त अनुभवको अध्यक्षतामा कार्यक्रम सम्पन्न भएको हो ।
कार्यक्रममा झिल्का काव्य विधाका तीन कृतिहरू विमोचन गरिएका थिए । नेपाल, भारतलगायत विभिन्न देशमा रहेका ८३ जना झिल्काकारहरूको संयुक्त सङ्ग्रह ‘आवाज’, वसन्त अनुभवको एकल सङ्ग्रह ‘अनुभव’ र सुरेशकुमार पाण्डेको सङ्ग्रह ‘आँगन’ विमोचन गरिएको हो ।
विमोचित कृतिहरूमध्ये ‘अनुभव’को समीक्षा प्रमोद नेपालले, ‘आँगन’को समीक्षा अनुराग अरुणले तथा संयुक्त सङ्ग्रह ‘आवाज’को समीक्षा अरुण बहादुर खत्री ‘नदी’ले गर्नुभएको थियो ।
कार्यक्रममा कृति प्रकाशनका अवसरमा सुरेशकुमार पाण्डेलाई ‘झिल्का साहित्य समृद्धि सम्मान २०८३’ प्रदान गरिएको थियो । त्यस्तै, झिल्का कवितालाई पत्रिकामा प्रकाशनमार्फत योगदान पुर्याएबापत अग्रिम साप्ताहिक (तुलसीपुर, दाङ) र संसार न्यूज (ललितपुर) लाई ‘झिल्का साहित्य सञ्चार सम्मान २०८३’ प्रदान गरिएको थियो ।
संयुक्त सङ्ग्रह ‘आवाज’मा समाविष्ट सबै सर्जकहरूलाई ‘झिल्काश्री साहित्य सम्मान २०८३’ प्रदान गरिएको थियो ।
कार्यक्रमको प्रारम्भमा राष्ट्रियगानपछि दीप प्रज्वलन गरिएको थियो । ज्ञात–अज्ञात सहिदहरूको स्मरणमा एक मिनेट मौनधारण पनि गरिएको थियो ।
विशिष्ट अतिथिहरूमा कवि तथा साहित्यकार ललिता दोषी, घनश्याम पन्त, लता के.सी.लगायत रहनुभएको थियो भने विशेष अतिथिहरू तथा अन्य स्रष्टाहरूले झिल्का कविता वाचन गर्नुभएको थियो ।
दीपा गुरुङ समभावले सञ्चालन गर्नुभएको कार्यक्रम चार घण्टाभन्दा बढी समयसम्म चलेको थियो ।