१
भित्रभित्रै जलाइदिन्छ तिम्रो हँसिलो मुहारले
सम्हाल्न नपाई ढलाइदिन्छ तिम्रो हँसिलो मुहारले ।
रम्भा हौ तिमी, तिलोत्तमा हौ या उर्वशी, को हौ तिमी ?
हिँड्दा–हिँड्दै गलाइदिन्छ तिम्रो हँसिलो मुहारले !
२
सम्बन्धको डोरी हजुर, कहिले टुट्न हुन्न
साथीभाइ, इष्टमित्र कहिले छुट्न हुन्न ।
एकबारको जीवन हो, प्रेम–स्नेह बाँड्दै जाऊ
निर्दोष निमुखालाई कठै, कहिले लुट्न हुन्न !
३
चाहना नै सबथोक होइन रहेछ जिन्दगीमा
भोजनभन्दा नि भोक ठुलो रहेछ जिन्दगीमा ।
जीवनको हरेक दृष्टिले हेरे पनि समानता नपाइने
भित्रभित्रै उसै गलाइदिने शोक रहेछ जिन्दगीमा !