हरेक हलिउड स्टुडियोलाई आफ्नै 'क्रिस्टोफर नोलन' चाहिएको छ। यस सप्ताहन्तले त्यसको कारण देखाएको छ।
नोलनले लेखेको र निर्देशन गरेको फिल्म ‘द ओडिसी’ ले विश्वभर करिब २६ करोड ४१ लाख डलर कमाउँदै धाँसू ओपनिङ गरेको छ। अमेरिकाभित्र यसको १२ करोड ४५ लाख डलरको डेब्यु यस वर्षको तेस्रो ठूलो ओपनिङ हो। यो एनिमेटेड फिल्महरू ‘टोय स्टोरी ५’ र ‘द सुपर मारियो ग्यालेक्सी मुभी’ भन्दा मात्र पछाडि छ।
एडल्ट सर्टिफिकेट पाएको फिल्मको यो विशाल कमाइ यो वर्षको पहिलो बन्न पुगेको छ ।
यसको ओपनिङ सन् २०२६ मा रिलिज भएका चलेका नामहरू जस्तै ‘स्टार वार्स: द म्यान्डलोरियन एन्ड ग्रोगु’, ‘सुपरगर्ल’ र ‘स्क्रिम ७’ को भन्दा पनि बढी छ।
नोलनको नाम र उनले विगतमा गरेको कमाइले गर्दा नै कमकास्टको युनिभर्सल पिक्चर्सले झन्डै २५ करोड डलर बजेटको यो फिल्म बनाउन राजी भएको हो। प्राचीन ग्रिक कवितामा आधारित यो आर-रेटेड (R-rated) फिल्म युरोपभर सुटिङ गरिएको छ। यसमा ३५ फिट अग्लो र ८,००० पाउन्ड तौल भएको 'ट्रोजन हर्स' लगायत धेरै वास्तविक इफेक्टहरू प्रयोग गरिएका छन्।
रेन्ट्राक कम्पनीको तथ्यांक अनुसार, ‘द ओडिसी’ हेर्न जाने ५३ प्रतिशत दर्शकले यो फिल्म हेर्नुको मुख्य कारण यसका निर्देशक हुन् भनेका छन्। "यस्तो कुरा विरलै देख्न पाइन्छ," फिल्म निर्माता युनिभर्सलका आन्तरिक वितरण अध्यक्ष जिम ओरले भने, "क्रिस नोलनले दर्शकको विश्वास र सम्मान कमाएका छन्।"
सन् २००० र २०१० को दशकमा फिल्म उद्योगमा फ्रेन्चाइज (शृंखला) हरूको दबदबा थियो। स्टुडियोहरूले सिक्वेल, स्पिनअफ र रिमेकहरू सकेसम्म छिटो बनाउन सक्ने निर्देशकहरूलाई मात्र काम दिन्थे। आफ्नै सर्तमा काम गर्ने थोरै फिल्म निर्माताहरूमध्ये नोलन सबैभन्दा सफल थिए। निकै सफल 'डार्क नाइट' ट्रियोलजीसँगै उनले 'इन्सेप्सन' र 'इन्टरस्टेलर' जस्ता हिट ओरिजिनल फिल्महरू बनाए।
तर मार्भल, फास्ट एन्ड फ्युरियस र ट्रान्सफर्मर्स जस्ता फिल्महरूले पछिल्लो समय बक्स अफिसमा खासै कमाउन सकेका छैनन्। दर्शकहरू यस्ता फिल्मबाट वाक्क भइसकेका छन्। विशेषगरी नयाँ पुस्ता (जेन जी) पुरानै ब्रान्ड र प्रविधिमा धेरै भर पर्ने फिल्मप्रति विश्वस्त देखिँदैनन्। उनीहरू 'अब्सेसन' जस्ता ब्लकबस्टर हरर फिल्मका निर्देशक करी बार्कर जस्ता आफ्नै मौलिक सोच भएका निर्देशकहरूले भनेका कथामा बढी तानिन्छन्। यो वर्ष 'प्रोजेक्ट हेल मेरी' र 'ब्याकरुम्स' जस्ता निर्देशकको भिजनमा बनेका धेरै फिल्महरू हिट भएका छन्।
यसको जवाफमा, पहिले फ्रेन्चाइज व्यवस्थापनमा मात्र मरिहत्ते गर्ने स्टुडियोहरू अहिले सम्भावना भएका राम्रा फिल्म निर्माताहरूलाई भित्र्याउन बढी ऊर्जा खर्चिरहेका छन्। यी सर्जकहरूले ठूला ब्रान्डलाई पर्दामा ल्याउन करोडौं डलर पारिश्रमिक पाइरहेका छन् भने नयाँ कथाका लागि बजेट पनि बढाइएको छ।
हलिउडको क्रिएटिभ आर्टिस्ट एजेन्सीका प्रमुख कार्यकारी ब्रायन लार्डले भने, "के चल्छ र के चल्दैन भन्ने कुरामा स्टुडियोहरू अलमलमा छन्। कुराहरू पुस्ताअनुसार परिवर्तन भएका छन् र व्यक्तिगत तथा छुट्टै आवाज भएकाहरूले यसको फाइदा लिइरहेका छन्।"
वार्नर ब्रदर्सले ‘ब्ल्याक प्यान्थर’ र ‘क्रिड’ का निर्देशक रायन कुग्लरलाई उनको ओरिजिनल हरर फिल्म ‘सिनर्स’ बनाउन एकदमै राम्रो सम्झौता दिएको थियो, जुन गत वर्ष हिट भयो। ‘वेपन्स’ का निर्देशक ज्याक क्रेगरले यसै वर्ष सोनी पिक्चर्सको लागि भिडियो गेम ‘रेसिडेन्ट इभिल’ मा आधारित फिल्म बनाउँदैछन् र उनी वार्नरले नयाँ हरर फिल्मका लागि गरेको ठूलो सम्झौताको हिस्सा पनि थिए। ‘बार्बी’ की निर्देशक ग्रेटा गर्विगले आफ्नो प्रभाव प्रयोग गर्दै नेटफ्लिक्सलाई उनको नयाँ फिल्म ‘द क्रोनिकल्स अफ नार्निया’ अर्को वर्ष विश्वभर हलमा रिलिज गर्न राजी गराएकी छिन्।
महामारीको समयमा आफ्नो फिल्म 'टेनेट' को निराशाजनक रिलिज र कम्पनीले २०२१ का सबै फिल्महरू एकैसाथ हल र स्ट्रिमिङमा ल्याउने निर्णय गरेपछि नोलनले लामो समयदेखि काम गर्दै आएको वार्नर ब्रदर्स छाडेका थिए। त्यसपछि उनलाई धेरै स्टुडियोहरूले पछ्याएका थिए।
उनको नयाँ सहयोगी युनिभर्सलले उनलाई लगभग पूर्ण स्वतन्त्रता मात्र दिँदैन, बरु उनका फिल्महरूलाई हलमा मात्र असाधारण रूपमा लामो समय दिएर घरमै बसेर हेर्दा हुने सम्भावित आम्दानी पनि माया मार्छ। युनिभर्सलका लागि उनको पहिलो फिल्म, २०२३ को 'ओपेनहाइमर', रिलिज भएको १२० दिनपछि मात्र घरमा हेर्न उपलब्ध भएको थियो। जबकि फिल्म उद्योगको सामान्य नियम अनुसार यो समय ४५ दिनको मात्र हुन्छ।
'ओपेनहाइमर' ले संसारभर ९७ करोड ६० लाख डलरको सानदार कमाइ गरेको थियो र उत्कृष्ट फिल्म र निर्देशकसहित सातवटा ओस्कार अवार्ड जितेको थियो।
नोलनका धेरैजसो फिल्महरू जस्तै, 'द ओडिसी' ले पनि महँगो टिकट पर्ने आईम्याक्स हलहरू सबै हाउसफुल हुँदा फाइदा लियो। नोलनले आईम्याक्सको ठूलो पर्दा भरिने गरी पूरै फिल्म खिचेका थिए। विश्वभरका कुल हलहरूमध्ये १ प्रतिशतभन्दा कम मात्र आईम्याक्स हल भए तापनि यसले कुल विश्वव्यापी कमाइको करिब २० प्रतिशत हिस्सा ओगटेको छ।
अनुसन्धान कम्पनी इन्टटेलिजेन्सका अनुसार, अमेरिका र क्यानडामा बिक्री भएका कुल टिकटमध्ये ४५ प्रतिशत टिकट सबै प्रकारका प्रिमियम स्क्रिन (ठूला र सुविधासम्पन्न हल) हरूको थियो।
अनुसन्धान कम्पनी सिनेमास्कोरका अनुसार दर्शकबाट पाएको 'ए' सर्टिफिकेट र अत्यधिक सकारात्मक समीक्षाको आधारमा, 'द ओडिसी' सन् २०१२ को 'द डार्क नाइट राइजेज' पछि विश्वभर १ अर्ब डलरभन्दा बढी कमाउने नोलनको पहिलो फिल्म बन्न सक्छ।