१.
थाहै नदिई छोडिदियौ सहर गएपछि
अन्तै बाटो मोडिदियौ सहर गएपछि ।
कहिल्यै नटुट्ने हाम्रो अटुट सम्बन्ध
कुन्नी किन तोडिदियौ सहर गएपछि !
२.
भाग्यमा छैन, मन ठोकी चित्त बुझाउँला
चलेको यात्रा यहीँ रोकी चित्त बुझाउँला ।
स्वार्थी सहरमा गएर बस्न कत्ति सक्दिनँ
बरु गाउँमै भारी बोकी चित्त बुझाउँला ।
३.
तपाईँले अनेकथरी जान्नुभयो ठिकै छ
मलाई दुश्मन सरह मान्नुभयो ठिकै छ ।
सायद अब भन्नुपर्ने केही गुनासो छैन
आफन्त थिएँ, पराई ठान्नुभयो ठिकै छ ।