मनको बेमेल किन गर्छौ, आपसमा किन गर्छौ फाटो ?
सम्मान गर्नुको साटो, हिँड्छौ किन प्रतिवादको बाटो ?
बोटअनुसारको फल हुन्छ, खुराकअनुसार बल हुन्छ
सकारात्मक भयौँ भने, परिणाम डबल नै फल्छ ।
उब्जनीलाई मिल्दो माटो, सबै उस्तै हुँदैनन् पाटो
सम्मान गर्नुको साटो, हिँड्छौ किन प्रतिवादको बाटो ?
जस्तो गुरु उस्तै चेला, सोच्नुपर्छ गुरु छान्ने बेला
भुइँको टिप्न लोभ गर्दा, पर्ला नि अरूकै फेला ।
सानो लोभले ठुलो घाटो, नबनाऊ आफैँलाई टाटो
सम्मान गर्नुको साटो, हिँड्छौ किन प्रतिवादको बाटो ?
बाबुगुनाको बालो हुन्छ, समयअनुसार पालो हुन्छ
आमागुनाको बुद्धि हुन्छ, कर्मअनुसार सिद्धि हुन्छ ।
मन मिलेपछि सबै सजिलो, किन चाहियो फाटो ?
सम्मान गर्नुको साटो, हिँड्छौ किन प्रतिवादको बाटो ?
राम्रो कर्मको मीठो फल, ढिलो भए पनि पर्छ हात
सम्मानको बाटो रोजेपछि, हुन्छ मीठो जीवन–बात ।
विश्वास र सम्मानले नै, बलियो बन्छ सबै नातो
सम्मानको बाटो रोजौँ, छोडौँ अब प्रतिवादको बाटो ।