महिला : कोदो पेलेर के तेल आउँथ्यो र !
निर्मोहीले के माया लाउँथ्यो र !
माया धाई-धाई
नमिसाऊ मायाले कोदो तोरीलाई।
पुरुष : कोदो र तोरी उस्तै पो देखिन्छ
पोल्टो थाप्दा खल्तीको पोखिन्छ ।
माया लाई-लाई
चिन्नुपर्छ मायाले कोदो तोरीलाई।
महिला: नलगाउने पिरती तिमीले लाएपछि,
साँचो कुरा नभनी तिमी धाएपछि।
विश्वासमा सङ्कट त आइ नै रहन्छ
जिन्दगीमा नसोचेको कुरा भएपछि ।
माया धाई-धाई
नमिसाऊ मायाले कोदो तोरीलाई ।
पुरुष: लडाइँले हे माया वीरलाई चिनाउँछ
विपत्तिले हे माया साथीलाई चिनाउँछ।
झुटो हैन पिरती विश्वास गरिदेऊ
विश्वासले हे माया पिरती बसाउँछ।
माया लाई-लाई
चिन्नुपर्छ मायाले कोदो तोरीलाई।
महिला: पोखिरह माया तिमी, म उठाइरहन्छु
मेटिरह माया तिमी, म कोरिहन्छु ।
भनाइ र गराइमा कहिले हुन्छ एकै ?
गीत मिठो गाऊ तिमी, म सुनिरहन्छु ।
माया धाई-धाई
नमिसाऊ मायाले कोदो तोरीलाई।
पुरुष: चैन छैन निद्रा छैन, लामो-लामो रात
जिउँछु होला पाए तिम्रो सधैँ साथ ।
लामो यात्रा जीवनमा तिम्रै साथ हुँदा
लामो गन्थन नगर न, मिलिसक्यो बात ।
माया लाई-लाई
चिन्नुपर्छ मायाले कोदो तोरीलाई।