खोलीले सागर भेट्ला कि, बगरको कथा लेख्ला कि
किनारा आफ्नो सम्झिँदै सुदूर मुहान देख्ला कि !
छोरीलाई देश छोडेर भूगोलपारि हुनेलाई
भूगोलको पश्चिम कुनामा, छाती चिरेर रुनेलाई
खोलीले सागर भेट्ला कि, स्वप्नले सगर देख्ला कि
देशमा छोरी रोएको जङ्घारले कतै छेक्ला कि !
पराई भूमिमा घोटिँदा, ऐठन कति हुँदो हो !
माइती आँगन सम्झिँदा, चेलीको मन रुँदो हो
आँसुले आशा भेट्ला कि, हाँसोको भाषा लेख्ला कि
सपनाको सहर–सगरले, मनको तार छेक्ला कि
किनारा आफ्नो सम्झिँदै सुदूर मुहान देख्ला कि !