माइतीघर के छ र मेरो ?
खाइयो पानी, बिर्सियो पँधेरो ।
बस्नलाई त दिएनौ क्यारे
दैलामाथि फोटो छ, त्यही हेरेँ ।
साना भए ती स्कुले जामा
छैनन् अब ती प्यारा बाउआमा ।
बाउआमाले छोडेर गएपछि
दाजुभाइ नि पराइ भएपछि ।
माइतीघरको त्यो पुरानो झोला
फेरि हेर्न होला कि नहोला ?
माइतीघर लाग्दथ्यो राम्रो
अहिले किन भएछ झन् चाम्रो ?
डढेलोले खाएको त्यो वन
पलाएन दुखेको यो मन ।
बिहेपछि छुटेको माइती
नौलो गाउँ, फेरिए सारथी ।
बारीभरि फुलेछ प्याउली
माइती गाउँमा कराउँछ न्याउली ।
माइतीघर छोड्ने नै चलन
छोडी आएँ, तैपनि जलन ?
टिप्पणीहरू
अहिले कुनै टिप्पणी छैन। पहिलो टिप्पणी तपाईं नै गर्नुहोस्।