नपर्ख है, वीरबलको खिचडी पाक्दैन
कुरी नबस, हुटिट्याउँले आकाश थाम्दैन ।
हार्नेको त यहाँ कतै कथा लेखिन्न
रित नै छ संसारको, सबै थोक भेटिन्न ।
रस मीठो उखुको, फल कतै देखिन्न
कथा लेख्ने कलमको आफ्नै व्यथा लेखिन्न ।
सुगन्ध छ चन्दनमा, फूल कतै देखिन्न
रित नै छ संसारको, सबै थोक भेटिन्न ।
चमक राम्रो सुनको, तर बास्ना आउँदैन
कस्तुरीले आफ्नै सुवास किन चिन्दैन ?
उज्यालो छर्ने दियोले आफ्नै मुनि देख्दैन
रित नै छ संसारको, हारको कथा लेखिन्न ।
पानी छ सागरमा, तिर्खा त्यसले मेटिन्न
अटल छ हिमाल, शिखरमा फल भेटिन्न ।
मान्छे चिन्न गाह्रो छ, अनुहारमा देखिन्न
रित नै हो संसारको, घाम र जूनसँगै भेटिन्न ।
रित नै छ संसारको, हारको कथा लेखिन्न
रित नै छ संसारको, सबै थोक भेटिन्न ।