तिमीलाई खोज्न कति ठाउँ धाएँ
आखिर आफ्नै मुटुभित्र पाएँ ।
वसन्तहरूमा फूलभित्र खोजेँ
जुनेलीहरूमा जूनभित्र खोजेँ
घुम्टो उषाको उठाई चियाएँ
आखिर आफ्नै मुटुभित्र पाएँ।
षोडशीहरूका नजरभित्र खोजेँ
पन्छाउँदै बादल सगरभित्र खोजेँ
अनि इन्द्रेणीमा पनि दृष्टि लाएँ
आखिर आफ्नै मुटुभित्र पाएँ।
बैँसालु अधरका गीतभित्र खोजेँ
पातमा परेका शीतभित्र खोजेँ
तिमीलाई नदेख्दा खुबै छटपटाएँ
आखिर आफ्नै मुटुभित्र पाएँ।