तपाईँ सक्नुहुन्न प्रेम गर्न, मन आँटिलो चाहिन्छ
बिछोडको पीडा सहन, मुटु दरिलो चाहिन्छ ।
बाछिटा पर्न सक्छ मैसाब, छुने चेष्टा नगर्नुस्
म कमल हूँ, मलाई फुल्न पनि हिलो चाहिन्छ ।
बुहारीले घर बिगारी बिन्ती नभन्नुस् आमा
सर्वप्रथम हजुरकै छोरो गतिलो चाहिन्छ ।
‘भोक लागे पानी खा’ भन्नुहुन्छ मालिक हजुर
भोक नलाग्न ‘पानी’ पनि त आडिलो चाहिन्छ ।
मलाई भित्ता सम्झेर टाँस्नुभयो झुन्ड्याउनुभयो
यतिले मात्रै दुखिनँ म, काँटी पेचिलो चाहिन्छ ।