भर्खर निभेको थोत्रो मकल छ
बेगर सलेदो के दीप जल्छ ?
पर्खेर बस्ने मायालु मनमा
के हुन्छ भन्ने आभास चल्छ ।
मौका मिलेमा हाँसेर जिउनु
सायद यही नै बस एक पल छ ।
ब्रह्माण्ड साक्षी राखेर भन्छु
माया हमेसा तिम्रो अटल छ ।
अनुहार उस्तै कोमल मुलायम
कहिले नभुल्ने तिम्रो गजल छ ।
धोका दिनेले हद पार गर्छन्
उस्तै नठान्नु सुनझैँ पितल छ ।
गाह्रो नमानी छानेर खोजौँ
को धूर्त होला, को नै असल छ ?
खोज्दै नजाऊ अन्यत्र तिमीले
दिलको कुनामा मीठो कमल छ ।