राम्रो खोज्दै हिँड्दा बाटोमा दैत्य र मय भेटिन सक्छ
नसोचेको अपत्यारिलो ठुलो भय भेटिन सक्छ ।
योजनाबद्ध र एकतामा कर्महरू गर्दै जाँदा
अकल्पनीय समरमा पनि जय भेटिन सक्छ ।
आफ्नो पाप र धर्मको हिसाब आफैँले गर्दा हुन्छ
धर्मले मात्रै जीवनको दिव्य लय भेटिन सक्छ ।
दुःखको सागरमा डुबेँ भनेर चित्त नदुखाऊ
रातपछि दिन आएझैँ सुखी समय भेटिन सक्छ ।
आफ्नाले नै आफ्नाको कुभलो चिताउन सक्छन् यहाँ
भुइँमै झार्ने कुटिल योजना तय भेटिन सक्छ ।
कर्मको फल प्रतिशतमै आशा गर्दा हुन्छ साथी
सत्कर्मले असी-नब्बे मात्रै होइन, सय भेटिन सक्छ ।