निस्फिक्री भई पिएँ आज, धेरै दिनको तल थियो
मनका पीडा बिर्साउने त, यही शीतल जल थियो ।
बेहोसीमा हराउँदै गएँ, तिम्रै यादमा रमाउँदै गएँ
विरक्तिएका ती पलभित्र, रूप त्यो चञ्चल थियो ।
नजर जुधे, मन मिल्यो, माया बस्यो अन्जानमै
खै किन बाटो मोड्यौ ? सम्झँदै मन पागल थियो ।
निर्दयी रैछ समय यो, छुटाएरै छोड्यो आखिर
सँगै हास्थ्यौँ, खेल्थ्यौँ, क्या रमाइलो पल थियो ।
मनमुटु साटेका थियौँ, कहिल्यै नछुट्ने बाचा थियो
आश्चर्य छु आफैँ आज, कुन्नि केको छल थियो ।
सम्झी–सम्झी रुनुबाहेक अरू थिएनन् विकल्प
तिम्रो यादमा लेखिएको, एउटा मिठो गजल थियो ।
अतीतका घाउ चहर्याउँछन्, विरहले जल्छ मन
विश्वास धेरै गरेको नै, सायद यस्तो फल थियो ।