केही कुरा सुनाउँदै छु, केही लुकाउँदै छु
मनभित्र गुम्सिएका, व्यथा फुकाउँदै छु ।
हरेक पल उमङ्ग थियो, अङ्गालोमा उनी थिइन्
संसार दिएँ निर्दयीलाई, मूल्य चुकाउँदै छु ।
अजम्बरी नाता थियो, मनमुटु गाँसिएको थियो
उनकै यादमा विरहका, गीत गाउँदै छु ।
माया गर्यौँ एकअर्कालाई, संसार बिर्सिएर
वैरी थियो समाज अहिले, नजर झुकाउँदै छु ।
हरेक पल भरिन्छन् नयन, अतीत सम्झिएर
पल पल तिम्रो तस्बिर, आँसुले भिजाउँदै छु।
यादमा जल्दै बितेका छन्, जिन्दगीका पलहरू
खुसी खोस्यो जिन्दगीले, एक्लै रमाउँदै छु ।