कसैले नसोध्नु हालचाल मेरो, कस्तो खबर छ
छोडेर गाउँघर बजार सर्ने, अझै उस्तै लहर छ ।
घरखेत बेचेर दुख सकियो, किनियो एक घडेरी
हातमुख जोर्न भागदौड गर्ने, यस्तो पापी सहर छ ।
साथी र भाइ आफन्त मित्र, कोही छैन भेट्नलाई
के रात के दिन कोलाहल पर्ने, एकनासको प्रहर छ ।
धुवाँ र धुलो हैजा फिँजाउने, कङ्क्रिटको छ थुप्रो
हरियाली दृश्य देखिन्न मर्ने, हावामा पनि जहर छ ।
म निसासिन्छु हरेक पल, सम्झी त्यो गाउँघर
अशान्ति असुरक्षा अनुभूति छर्ने, यस्तो अभर छ ।