आज धेरै कर्णालीमा पानी परेको छ
बलेनीमा गाग्रो थापी पानी भरेको छ ।
धारामा कहिल्यै नआएपछि उसको
त्यही गाग्रोको पानी पिउँदै प्यास टरेको छ ।
मिनरल वाटर पिउने तिमीलाई गन्ध आउँछ होला
गाग्रोको नै पिउने हामीलाई बानी परेको छ ।
शिक्षा, स्वास्थ्य, अस्पतालको सुविधा नपाउँदा
अलिकति पैसा हुने बसाइँ सरेको छ ।
तिमी नेता काठमाडौँमा भाषण दिँदै बसेका छौ
त्यही झरीले आज यता धेरै नोक्सान गरेको छ ।
जताततै डुबान अनि बाढी–पहिरो आउँदा
आज फेरि दुःखी गरिब जनता मरेको छ ।
गाडी अनि हेलिकप्टर केही पनि हुँदैनन् यता
उकालोमा भारी बोक्दै गधा चरेको छ ।
केबुलकार र जिपलाइनको मज्जा लिँदै हिँड्छौ तिमी
सानो बालक तुइन चढेर खोला तरेको छ ।