बुटवल । छन्दवादी समाज नेपाल, केन्द्रीय कार्यालय रूपन्देहीको आयोजनामा “छन्दको मानवीकरणः विचार र सौन्दर्यको प्रश्न” विषयक साहित्यिक विचार गोष्ठी बुटवलस्थित एसियन पार्टी प्यालेसको सभाहलमा सम्पन्न भएको छ ।
गोष्ठीमा साहित्यकार प्रा. डा. रामप्रसाद ज्ञवाली प्रमुख अतिथि तथा वक्ताका रूपमा सहभागी हुनुहुँदै छन्दीय साहित्यको ऐतिहासिक पृष्ठभूमि, मानवीय संवेदना र समकालीन साहित्यमा छन्दको अपरिहार्यतामाथि विस्तृत चर्चा गर्नुभयो । उहाँले छन्द केवल संरचनागत बन्धन मात्र नभई मानवीय अनुभूति, विचार र सौन्दर्य अभिव्यक्तिको सशक्त माध्यम भएको धारणा व्यक्त गर्नुभयो ।
छन्दवादी समाज नेपालका प्रमुख सल्लाहकार तथा कार्यक्रमका विशेष अतिथि साहित्यकार प्रा. डा. हिरण्यलाल ज्ञवालीले छन्दीय चेतनाको विकासक्रम, छन्द र सामाजिक यथार्थबीचको अन्तर्सम्बन्ध तथा नेपाली साहित्यमा छन्दको भूमिकामाथि आफ्ना विचार प्रस्तुत गर्नुभयो । उहाँले छन्दीय सिर्जनामा अनुशासनसँगै भावनात्मक गहिराइ अनिवार्य हुने बताउनुभयो ।
त्यसैगरी विशेष अतिथि तथा वक्ताका रूपमा साहित्यकार एवं सौन्दर्यचिन्तक प्रा. डा. देवी नेपालले छन्दको सौन्दर्यशास्त्रीय पक्षमाथि गहन विश्लेषण प्रस्तुत गर्नुभयो । उहाँले विचार, सौन्दर्य र मानवीय चेतनाको समन्वय भएको छन्दीय साहित्य दीर्घकालीन र प्रभावशाली हुने उल्लेख गर्नुभयो ।
कार्यक्रममा उपस्थित साहित्यकार, स्रष्टा तथा साहित्यप्रेमीहरूले वक्ताहरूका धारणा प्रति चासो व्यक्त गर्दै अन्तर्क्रियामा सक्रिय सहभागिता जनाउनुभएकाे थियाे । गोष्ठीले छन्दीय साहित्यप्रतिको बुझाइ थप समृद्ध बनाएको सहभागीहरूको धारणा थियो ।
छन्दवादी समाज नेपालका संस्थापक अध्यक्ष कविराज पौडेलको सञ्चालनमा सम्पन्न कार्यक्रममा समाजका सल्लाहकार तथा विशेष अतिथि प्रा. डा. हिरण्यलाल ज्ञवालीले स्वागत मन्तव्य व्यक्त गर्नुभएको थियो । कार्यक्रम सभ्य, सौहार्दपूर्ण तथा बौद्धिक वातावरणमा सम्पन्न भएको थियो ।
कार्यक्रमको अन्त्यमा छन्दवादी समाज नेपालका सल्लाहकार तथा समालोचक डा. शालिकराम ज्ञवालीले यस्ता साहित्यिक कार्यक्रमहरू निरन्तर आयोजना गर्दै छन्दीय साहित्यको प्रवर्द्धन, अध्ययन–अनुसन्धान तथा सृजनात्मक विमर्शलाई अघि बढाइने जानकारी गराउनुभयो ।