.jpg)
पोखरेली स्रष्टा तथा छन्दनायक माधव वियोगीलाई चिसाप खेमलाल हरिकला लामिछाने साहित्य पुरस्कार प्रदान गरिने भएको छ ।
चितवन साहित्य परिषद्ले कृति मूल्याङ्कनका आधारमा प्रदान गर्ने उक्त पुरस्कार वियोगीको २०८२ सालमा प्रकाशित महाकाव्य ‘काव्यतपसी’का लागि प्रदान गर्न लागेको हो ।
साहित्यकार तथा समाजसेवी जीवा लामिछानेले आफ्ना मातापिताको सम्मानमा चिसापमार्फत वितरण गर्ने गरी स्थापना गरेको पुरस्कारका लागि २०८२ सालमा प्रकाशित भई मूल्याङ्कनार्थ पेस भएका कृतिमध्ये ‘काव्यतपसी’लाई उत्कृष्ट ठहर गरिएको परिषद्ले जनाएको छ ।
वियोगीलाई ५० हजार ४५ रुपैयाँ राशिको पुरस्कार भानुजयन्तीका अवसरमा असार २८ गते भरतपुरमा आयोजना हुने विशेष समारोहमा प्रदान गरिनेछ । सोही समारोहमा बुनु लामिछाने, गायत्री श्रेष्ठ र शान्ति शर्मालाई पनि सम्मान गरिने जनाइएको छ ।
छन्दनायक वियोगी यसअघि असार २१ गते काठमाडौंमा डायमनशमशेर प्रतिभा पुरस्कारबाट सम्मानित हुनुभएको थियो । उहाँले पल्लव साहित्य पुरस्कार, छन्दरथी पुरस्कार, जसुन्धरा पुरस्कार, राधालक्ष्मी पुरस्कार, प्रतिभा पुरस्कार, रत्न श्रेष्ठ पुरस्कार तथा महाकवि देवकोटा पुरस्कारलगायत डेढ दर्जनभन्दा बढी पुरस्कार प्राप्त गरिसक्नुभएको छ ।
दश महाकाव्यसहित ४२ वटा पुस्तकका स्रष्टा वियोगीले नेपाली भाषाको श्रीवृद्धिमा लामो समयदेखि संस्थागत रूपमा पनि योगदान पुर्याउँदै आउनुभएको छ । उहाँ चिसापबाट दोस्रो पटक पुरस्कृत हुन लाग्नुभएको हो । यसअघि २०६२ सालमा उहाँको ‘छन्दशिरोमणि’ महाकाव्यलाई चितवन साहित्य परिषद्ले कृष्णकुमारी गुरुङ स्मृति पुरस्कार प्रदान गरेको थियो ।
जनप्रिय बहुमुखी क्याम्पसका पूर्वप्रमुखसमेत रहनुभएका वियोगी छन्द बचाऊँ अभियान र महाकाव्य लेखन अभियानका सञ्चालक हुनुहुन्छ । उहाँ गृह पुस्तकालय अभियानका गण्डकी प्रदेश संयोजकसमेत हुनुहुन्छ भने छन्द विश्वविद्यालय स्थापनाका लागि पनि सक्रिय रहँदै आउनुभएको छ ।