१
सम्झिरहन्छ सधैँभरि यो मनले पनि
तिमीले जस्तै छाड्यो बचपनले पनि ।
छुरा रोप्यौ पिठ्युँमा पोल्छ भत्भती
कहिलेसम्म थेग्छ कुन्नि जीवनले पनि !
२
मन फुलेको वर्षौँ भयो कहिलेसम्म फल्छ कुन्नि
छाक जुटाउँदै यो दियो कहिलेसम्म बल्छ कुन्नि।
मन उड्छ माथि सधैँ खुसी फुल्ने रहरमा
फल्छ भन्दै यो जिन्दगी कहिलेसम्म चल्छ कुन्नि !
३
नसा–नसामा देश दुख्दा तिमीसँगै रुन पाऊँ
शिर झुकाएर नेपाल आमा तिम्रै पाउ छुन पाऊँ ।
जङ्गल, पहाड, नदीसँगै उमङ्ग र उल्लास बोकी
मातृभूमि! तन, मन, वचनले सधैँ तिम्रो हुन पाऊँ ।
४
सधैँ सिङ्गो युग हिँडाउने बाटोलाई माया गरौँ
खोस्रिएको, खेलेको पल्लो पाटोलाई माया गरौँ ।
आफूले टेकेको माटो, हिँडेको बाटो बाँचुञ्जेल
सुगन्धित नाभि गाडिएको माटोलाई माया गरौँ ।