एडिलेड (अस्ट्रेलिया) । दक्षिण अस्ट्रेलियाको राजधानी एडिलेडमा साहित्य अनुरागी एडिलेडको आयोजनामा १९औँ शृङ्खलाअन्तर्गत २१३औँ भानुजयन्ती मनाइएको छ ।
मिचेल पार्क कम्युनिटी हलमा आयोजित कार्यक्रममा आदिकवि भानुभक्त आचार्यको तस्वीरमा पुष्पगुच्छा अर्पण गरी कार्यक्रमको शुभारम्भ गरिएको थियो ।
कार्यक्रममा स्थानीय साहित्यकार, कवि, गीतकार तथा गजलकारहरूले आदिकवि भानुभक्तले नेपाली भाषा र साहित्यको विकासमा पुर्याएको योगदानबारे चर्चा गर्दै आ–आफ्ना रचना वाचन गर्नुभएकाे थियाे ।
वाचन गर्नेहरूमा श्रीकृष्ण माझी, सुपक अधिकारी, रामकृष्ण शर्मा, नवीन कँडेल, प्रकाश पौडेल, क्षितिज सापकोटा, पुष्कर कोइराला, आरजू गिरी र कुमाराज सुवेदी रहनुभएकाे थियाे ।
विशेषतः शृङ्गार रसका गीत र गजलहरूको प्रस्तुति रहेको थियो । कवि कुमाराज सुवेदीले ‘परको देशदेखि प्रदेशसम्म’ र ‘सुदूर प्रकृति र उसको दैनिकी’ शीर्षकका कविता वाचन गर्नुभएकाे थियाे ।
देवराज कँडेलले सञ्चालन गर्नुभएको कार्यक्रम टिकाराम रेग्मीको अध्यक्षतामा सम्पन्न भएको थियो ।
कार्यक्रमलाई एडिलेड नेपालले सहयोग गरेको थियो भने नेपाली बुक्स अस्ट्रेलियाले पुस्तक सौजन्य प्रदान गरेको आयोजकले जनाएको छ