काठमाडौं । बालबालिका तथा किशोर–किशोरीहरूलाई लक्षित रियालिटी शो ‘द पोएट आइडल जुनियर’को पहिलो टिजर तथा पर्फर्मेन्स भिडियो सार्वजनिक गरिएको छ ।
१८ वर्षसम्मका बालप्रतिभालाई लक्षित गर्दै सञ्चालन हुन लागेको कार्यक्रमले कविता सिर्जना र वाचनकलालाई राष्ट्रिय मञ्चमा स्थापित गर्ने उद्देश्य राखेको आयोजकले जनाएको छ ।
सार्वजनिक टिजरमा बालप्रतिभा समृद्धि राईको कविता तथा उनकी आमासँगको भावनात्मक संवाद समेटिएको छ । टिजरले बालबालिकाको सिर्जनात्मक क्षमता, संवेदनशीलता र अभिव्यक्तिको सौन्दर्यलाई उजागर गर्ने प्रयास गरेको देखिन्छ ।
आयोजकका अनुसार ‘द पोएट आइडल जुनियर’ बालबालिकाले आफ्ना मौलिक सिर्जना प्रस्तुत गर्न पाउने विशेष मञ्च हो । कार्यक्रममा सहभागीहरूले कविता लेखन, वाचनकला र सिर्जनात्मक अभिव्यक्तिमार्फत आफ्नो प्रतिभा प्रदर्शन गर्ने अवसर पाउनेछन् ।
सार्वजनिक गरिएको पहिलो टिजरले दर्शकमाझ कार्यक्रमप्रति उत्सुकता बढाएको आयोजकको दाबी छ ।