काठमाडौं । मुटुसम्बन्धी समस्या देखिएपछि साहित्यकार तथा मदन पुरस्कार विजेता राजन मुकारुङ अस्पताल भर्ना हुनुभएको छ । उहाँलाई काठमाडौंको सिभिल अस्पताल, मीनभवनमा उपचारका लागि भर्ना गरिएको छ ।
मुकारुङको स्वास्थ्य अवस्थाबारे विस्तृत विवरण सार्वजनिक नभए पनि चिकित्सकको निगरानीमा उपचार भइरहेको पारिवारिक स्रोतले जनाएको छ ।
वि.सं. २०६९ सालमा उपन्यास ‘दमिनी भीर’ का लागि मदन पुरस्कार प्राप्त गर्नुभएका मुकारुङ समकालीन नेपाली साहित्यका चर्चित स्रष्टामध्ये एक हुनुहुन्छ । भोजपुरमा वि.सं. २०३० सालमा जन्मिनुभएका उहाँले नेपाली साहित्यमा व्यावसायिक लेखकका रूपमा विशिष्ट पहिचान स्थापित गर्नुभएको छ ।
वि.सं. २०५० को दशकमा ‘सृजनशील अराजकता’ अभियानमार्फत साहित्यिक क्षेत्रमा सक्रिय हुनुभएका मुकारुङका ‘सेतो आरोहण’, ‘प्रारम्भ प्रक्षेपण’, ‘जिकिरको गद्दी’ र ‘मिथक माया’ कविता सङ्ग्रह तथा ‘हेत्छाकुप्पा’ उपन्यास चर्चित कृतिका रूपमा परिचित छन् ।
पछिल्लो समय नेपाली साहित्यका केही चर्चित स्रष्टाहरू स्वास्थ्य समस्याका कारण अस्पताल भर्ना भएका छन् । यसअघि साहित्यकार कुमार नगरकोटी र वरिष्ठ साहित्यकार सरुभक्त पनि मुटुसम्बन्धी समस्याका कारण अस्पताल भर्ना हुनुभएको थियो । हाल उहाँहरू स्वास्थ्यलाभ गरिरहनुभएको जनाइएको छ।
राजन मुकारुङको शीघ्र स्वास्थ्यलाभको कामना गर्दै साहित्यिक वृत्त, पाठक तथा शुभेच्छुकहरूले सामाजिक सञ्जालमार्फत शुभेच्छा व्यक्त गरिरहेका छन् ।