१
फ्याउराहरू बास्न थाले भोटे कुकुर लगाइदिनू
देशघातीहरूलाई डाँडा पनि कटाई भगाइदिनू ।
नेपाल आमालाई चिथोर्ने–टोक्ने व्वाँसाहरूलाई
ढल मिसिएको बागमतीमा फालेर बगाइदिनू ।
२
मीठो खोज्न बजारमा कदम चालाचाल छ
खाद्यवस्तुको नाममा मन्दविष फालाफाल छ ।
घातक खानेकुरा स्वादसँग थलिएपछि भने
निजी अस्पतालहरूलाई यहाँ मालामाल छ ।
३
म दोषी होइन भन्दा पनि जितेर गयौ
मलाई गुण्डाको रोहवरमा पिटेर गयौ ।
दोष अर्कैको थियो प्रिय ! बुझिनौ आखिर
मेरो मुहारमा कालोमोसो लिपेर गयौ ।