१
साँझ–बिहान तिम्रै झल्को आउँछ के गरूँ
खबर सुनूँ पलपलको लाग्छ के गरूँ ।
मैले प्रेम भनेँ, तिमीले खै के नाम दियौ सम्बन्धको ?
तिमी मेरो जोडी भन्न मन लाग्छ के गरूँ !
२
न त कुनै गुनासो छ, न त कुनै बदलाको भाव छ
तिम्रो खुसी हेरी बाँच्ने, यो मनको एउटा स्वभाव छ ।
तिमी टाढिए पनि सधैँ, तिम्रो भलो नै चिताइरहनेछु
मेरो निस्वार्थ प्रेममा, कमी छैन मात्र तिम्रो अभाव छ ।
३
मेरो हाँसो, मेराे खुसी, मेरो संसार थियौ तिमी
बढी के भनूँ, मेरो हर प्रार्थनामा थियौ तिमी ।
तिमी त सजिलै मोडिएर अर्कै विकल्प रोज्यौ
मेरा लागि त सारा ब्रह्माण्डको आधार थियौ तिमी ।