काठमाडौं । सः दबू साहित्यद्वारा नियमित रूपमा आयोजना हुँदै आएको लघुकथा एकलवाचन कार्यक्रमको चौथो शृङ्खला सम्पन्न भएको छ । प्रत्येक महिनाको पहिलो शनिबार आयोजना गरिने उक्त कार्यक्रममा यसपटक लघुकथाकार अन्जना ताम्राकारलाई आमन्त्रण गरिएको थियो ।
कार्यक्रममा ताम्राकारले आफ्ना १५ वटा लघुकथा वाचन गर्नुभएको थियो । निर्धारित समयमै शुरू भएको कार्यक्रम एक घण्टाभित्र सम्पन्न गरिएको आयोजकले जनाएको छ ।
सभाध्यक्ष तथा प्रमुख अतिथिविनै सम्पन्न कार्यक्रममा लघुकथाकार ताम्राकारलाई संस्थाका सदस्यद्वय कबिन्द्रलाल प्रधान र सुरेन्द्रभक्त श्रेष्ठले फूलमालाद्वारा स्वागत गर्नुभएको थियो । कार्यक्रमको सञ्चालन संस्थाकी सदस्य समा श्रीले गर्नुभएको थियो ।
सः दबू साहित्यका संयोजक सुधीर ख्वबिले लघुकथाकार ताम्राकारलाई मायाको चिनो प्रदान गर्नुभएको थियो । साथै, कार्यक्रममा उपस्थित शुभेच्छुक श्रोता मोक्षबहादुर अमात्यले दोसल्ला ओढाएर उहाँलाई सम्मान गर्नुभएको थियो ।
कार्यक्रमका क्रममा उपस्थित श्रोतामध्ये एक जनालाई गोलाप्रथाद्वारा छनोट गरी लघुकथाकार ताम्राकारकै हातबाट उपहार प्रदान गरिएको थियो ।
लघुकथा वाचनमार्फत स्रष्टा र पाठकबीचको साहित्यिक सम्बन्धलाई थप सुदृढ बनाउने उद्देश्यले सः दबू साहित्यले नियमित रूपमा यस्ता कार्यक्रम सञ्चालन गर्दै आएको छ ।