पुनः प्रकाशन देवदूत २ः विवाह

(पाठकहरूको अत्यधिक मागका कारण विश्वप्रसिद्ध लेखक खलील जिब्रानको ‘क्लासिक’ कृति देवदूतलाई पुनः प्रकाशन शुरू गरिएको छ । २६ भागको यो कृति डा. सनतकुमार वस्तीजीले नेपालीमा अनुवाद गर्नुभएको हो । यस कृतिलाई हरेक सोमवार एकेक भागमा प्रस्तुत गरिरहेका छौं ।

सम्पादक, विश्वसाहित्य ।)

विवाह

तिमीहरू सँगसँगै जन्मिएका थियौ

अनि, अनन्त कालसम्म सँगै रहने छौ,

यो साहचर्य त्यसबेला पनि रहिरहने छ –

जब मृत्युका सेता पखेटाहरू फड्फडाएर

तिम्रा जीवनका क्षणहरूलाई

तितर-बितर पार्नेछन्,

हो, परमात्माका मौन स्मृतिहरूमा पनि

तिमीहरू एक-अर्काकै साथमा हुनेछौ,

आफ्ना निकटताका बीच-बीचमा

कतै-कतै अन्तराल पनि हुन देऊ,

स्वर्गको पवनलाई

यिनै अन्तरालका बीचमा नृत्य गर्न देऊ,

एक अर्कालाई प्रेम त गर

तर प्रेमलाई नेल र हतकडी नबनाऊ,

कति राम्रो हुनेछ –

जब तिम्रा आत्माहरूको दुई किनाराका बीचमा

आनन्दको एउटा अज्ञात समुद्र

लहराइरहेको होस्,

एक-अर्काको प्याला त भर

तर दुवैले एउटै प्यालाबाट नपिऊ,

आफ्नो रोटी उसलाई पनि खुवाऊ

तर दुवैले एउटै रोटी चुँडेर नखाऊ,

सँगसँगै मिलेर नाच, गाऊ अनि खुशी मनाऊ

तर आ-आफ्ना ठाउँमा एक्लै बस,

त्यसरी नै –

जसरी वीणाका प्रत्येक तार

छुट्टा-छुट्टै रहेर पनि

एउटै सङ्गीतबाट झङ्कृत हुने गर्दछन्,

एक-अर्कालाई आफ्नो हृदय समर्पण त गर

तर लिएर सधैं राख्नका लागि नदेऊ,

किनभने केवल विश्वात्माकै हातले

तिम्रो हृदयलाई ग्रहण गर्न सक्दछन् ,

एक साथ उभिन त उभिऊ

तर एकदमै टाँसिएर होइन,

किनभने मन्दिरका स्तम्भ

हमेशा केही न केही दूरीमा

खडा हुने गर्दछन्,

दुईवटा बिरुवाहरू

एक अर्काको छायाँमा

हुर्किन सक्दैनन् ।