मन छुने माया

हरियो वनको शीतल ओडेर
युग बिताएका चराका बथानहरू

मौसमी रङमा रमाएका
हाँगाका सबै फूलहरू बिर्सिएर
बसाइँ सरेका नीरस कथाहरू पनि
अब त धेरै पुरानो भैसकेको छ

तर पनि त्यही वनको- मनछुने माया
राउटेको हृदयमा अझै बाँकी नै छ ।

अनभिज्ञ

आफ्नै मान्छेले
घाँटी थिचेको पीड़ा
कहीँ न कहीँ देशलाई दुखेको छ
तर तिनै मान्छेहरू – घरी घरी
मुस्कानका कुरा गर्छन्

सायद उनीहरू अनभिज्ञ छन्
कि – देशको पनि हृदय हुन्छ ।