Chovar Blues Mobile Size

भारतमा हिन्दी भाषामा निकालिएका पुस्तकहरूको बिक्री उति राम्रो छैन तर गएको साता रेत समाधि उपन्यासले बुकर पुरस्कार पाएको खबरपछि भने सो पुस्तकको माग अत्यधिक चुलिएको छ । पाँच दिनमा नै पुस्तक ३५ हजारभन्दा बढी बिक्री भएको प्रकाशक राजकमलले जनाएको छ ।

रेत समाधिको अंग्रेजी अनुवाद टुम अफ स्यान्डले २६ मेमा पुरस्कार प्राप्त गरेको घोषणासँगै हिन्दी अनुवादको खोजी भएको र अनलाइनमार्फत् बिक्रीको अनुपात ह्वात्तै बढेको प्रकाशकले राजकमल प्रकाशनले जनाएको छ ।

कम्पनीका प्रमुख कार्यकारी आमोद महेश्वरीले रेत समाधिको पहिलो संस्करण चार वर्षअघि सन् २०१८ मा भएको बताउँदै सोही बेला उपन्यासको चर्चा राम्रै भएको बताए । साहित्यिक जगतमा गीताञ्जलीश्रीको राम्रै प्रतिष्ठा भएका कारण शुरूमा नै धेरैले यसलाई राम्रो मानेको उनले बताए । उनका अघिल्ला कृतिहरूको पनि राम्रै प्रतिक्रिया आए पनि यसको भने अभूतपूर्व भएको महेश्वरी स्वीकार गर्छन् ।

हिन्दीमा लेखिएको कुनै पुस्तक अनुदित भई यति ठूलो पुरस्कार प्राप्त गरेको हिन्दी साहित्यमा यो पहिलो कीर्तिमान भएका कारण पनि यसको माग चुलिएको हो ।

हालसम्म यो उपन्यासको हिन्दी संस्करण ४६ हजार भन्दा बढी बिक्री भइसकेको प्रकाशकले जनाएको छ ।