१. पानी भ्यागुतो

(बिकु लामा)

चारैतिरबाट
बनेको छ बन्दी
बीचमा छ एउटा पानी भ्यागुतो,
पर्खाल अग्लिँदै छ झन्झन्
तर भ्यागुतो
सडकसम्म पुग्नका लागि
खनिरहेछ माटो भित्रभित्रै !
अहो !
पर्खाल भत्किनेछ क्रमशः क्रमशः !

२. पुतलीहरूको रङ

(हरीश अधिकारी)

उज्यालो बटुल्दा बटुल्दै
झमक्कै साँझ पर्यो !

र साँझ छिप्पिँदै गएपछि मात्र थाहा भयो—
बटुलेको त्यो सबै उज्यालो
चोरी भइसकेको रहेछ !

निष्पट्ट अन्धकारमा पुतलीहरू
उही उज्यालो ओडेर, ओछ्याएर, ओकलेर
उन्मुक्त उडिरहेका थिए !

अघिसम्मका ती पुतलीहरूको रङ
अहिले एकाएक फेरिएको थियो !

३. छोएर जानेहरू

(रमेशचन्द्र अधिकारी)

मलाई छोएर जानेहरू
आँखाको डिलैडिल भएर गए !
आँखाबाट भुइँमा खस्नेहरूले
भिन्नाभिन्नै पिंजराभित्र
भिन्नाभिन्नै नक्साहरू कोरेर गए !
आँखाको रेटिनामा हेर्नोस् त—
परेलीमा नअटाएका गीतहरूले
यिनै उल्टा तस्बिरहरू छोडेर गए !

४. हाँस्ने हिमाल

(जनार्दन दाहाल)

बिहान उठ्दा ऊ
हिमाल हेरेर हाँस्ने गर्थ्यो !

आजकाल त ऊ
निकै ढिलो उठ्छ,

उसलाई नै हेरेर
हिमाल हाँस्ने गर्छ !

५. अछुतो भेरी

(किशन पौडेल)

पृथ्वीको एउटा कन्दरामा
पृथ्वीलाई नै नछोई
बगिरहेको छ अछुतो भेरी !

ए आदिम बस्तीहरू !
रोक उसका वेगहरूलाई
सुृकाऊ यो अछुतो पानी !

नत्र भोलि कसरी चोखो रहला
हरियो खेतबारी र चिसो बतास ?
कसरी चोखो रहला
मन्दिरको भगवान्
र समुद्रका आँसुहरूको इतिहास ?

लेखकका अन्य सिर्जनाहरू पढ्न यहाँ क्लिक गर्नुहोस्...